Përparim Kryeziu, zëdhënës i Qeverisë së Kosovës ka thënë për mediat se Kosova do të furnizohet me energji elektrike në ditën e ndërrimit të viteve.
“Ne padyshim se jemi falënderues Republikës së Shqipërisë për ndihmën e ofruar e cila është në kuadër të një bashkëpunimi të vazhdueshëm mes dy qeverive sa i përket fushës së energjisë,”-ka thënë Kryeziu.
“Dhe ky bashkëpunim do ta mundësojë ose do të sigurojë që gjatë ndërrimit të motmoteve të ketë furnizim të rregullt me energji elektrike. Kështu që atmosfera festive të mirëmbahet ashtu siç duhet”.
“Ky është një bashkëpunim që dy qeveritë e kanë me njëra-tjetrën sa i përket shkëmbimit të energjisë elektrike apo formave të tjera të kompensimit”, ka shtuar Kryeziu.
Para disa ditësh kryeministri Edi Rama, tha se po ndjek me vëmendje gjendjen me krizën e energjisë elektrike që po mbizotëron në Kosovë.
Rama theksoi se ka kërkuar që të gjendet forma që Shqipëria t’i dalë në ndihmë Kosovës që të ketë rrymë në ditët e ndërrimit të moteve.
Gjatë seancës së djeshme Kuvendi i Kosovës i ka rekomanduar masat emergjente duke synuar që të stabilizohet furnizimi me energji elektrike.
