Sipas një studimi të publikuar nga CNN, personat që flejnë 8 orë gjumë kanë funksionim më të mirë të trurit.
Pjesë e këtij studimi ishin 100 të moshuar, ndër të cilët u vëre se truri i atyre që flinin 8 orë gjumë kishin aftësi më të mira njohëse se ata që flinin më pak se pesë orë gjumë. Gjithashtu, ndikonin edhe faktorë si gjinia, patologjia, mosha.
Të rriturit duhet të flenë të paktën shtatë orë gjatë natës, ndërsa fëmijët e moshës shkollore duhet të flenë 9 deri në 12 orë dhe adoleshentët 8 deri deri në 10 orë, sipas Qendrave Amerikane për Kontrollin dhe Parandalimin e Sëmundjeve. Të rriturit shpesh përpiqen të flenë shtatë orë të plota. Por të bësh një gjumë të mirë dhe regjenerues do të thotë të flesh më shumë se disa orë. Cilësia e gjumit është gjithashtu shumë e rëndësishme.
Nëse zgjoheni shpesh për shkak të zhurmave, kjo ndërpret ciklin tuaj të gjumit dhe privon trupin nga gjumi që i nevojitet.
“Pika e ëmbël” e gjumit ndodh kur ju mund të plotësoni të katërta fazat e gjumit çdo natë. Meqenëse secila fazë është afërsisht 90 minuta, shumica e njerëzve kanë nevojë për shtatë deri në tetë orë gjumë.
Në fazat një dhe dy, trupi fillon të zvogëlojë ritmet e tij. Rrahjet e zemrës dhe frymëmarrja ngadalësohen dhe temperatura e trupit ulet. Kjo ju përgatit për fazën tjetër — një gjumë të thellë, me valë të ngadalta, i njohur gjithashtu si gjumi delta. Kjo është periudha kur truri qetësohet nga aktivitetet e ditës. Gjumi i lëvizjes së shpejtë të syve, i quajtur REM, ndodh më pas, raporton abcnews.al
Kjo është faza në të cilën ne ëndërrojmë dhe informacioni dhe përvojat konsolidohen dhe ruhen në kujtesë. Studimet kanë treguar se mungesa e gjumit REM mund të çojë në humbje të kujtesës dhe rezultate të dobëta njohëse, si dhe sëmundje të zemrës dhe të tjera kronike dhe vdekje të hershme.
Prandaj, mungesa kronike e gjumit ndikon në aftësinë tona për të mësuar gjëra të reja, për të qenë krijues, për të zgjidhur problemet dhe për të marrë vendime.
Fatkeqësisht, ndërsa njerëzit plaken ata fillojnë të kenë probleme me gjumin gjë që mund të ndikojë në mënyrë dramatike në funksionimin e trurit. Një studim i shtatorit 2021, i botuar në revistën JAMA Neurology zbuloi se të moshuarit që flenë më pak se gjashtë orë në natë kishin më shumë beta amiloid në tru sesa ata që flinin shtatë dhe tetë orë. Beta amiloidi është një shenjë dalluese e sëmundjes së Alzheimerit.
Si të përmirësojmë gjumin?
Duhet të flini dhe të zgjoheni në të njëjtat orare, përfshirë fundjavat, sipas ekspertëve. Bëni aktivitete përpara gjumit, si Yoga, një dush i ngrohtë, lexoni një libër-këto janë të gjitha mënyra për të ndihmuar trupin tuaj të relaksohet në gjumë.
Shmangni ushqimet yndyrore dhe pikante para gjumit, sigurisht edhe alkoolin.
