Procesi i fiskalizimit ka ecur me ritme të ngadalta gjatë 2021. Të dhënat tregojnë se deri në fund të vitit janë bërë pjesë e procesit vetëm 60 mijë biznese nga 120 mijë që janë në total.
Duke marrë shkas nga kjo e dhënë u mor vendim për shtyrjen e afatit të fiskalizimit deri në 30 qershor të vitit 2022 për biznesin e vogël e të mesëm.
Sipas ministrisë së financave deri në fund të qershorit nuk do të aplikohen gjoba që rrjedhin nga zbatimi i ligjit të Fiskalizimit për këto subjekte duke iu dhënë më shumë afat që të nisin lëshimin e faturave elektronike.
Shtyrjen e afatit të fiskalizimit e kërkoi me ngulm biznesi i vogël dhe i mesëm në vend por edhe Dhoma Amerikane Tregtisë.
Dhoma Amerikane kërkoi shtyrjen e periudhës tranzitore që lejon deklarimin manual në e-filing të librit të shitjeve dhe blerjeve si dhe shtyrjen e afatit të zbatimit të penaliteteve sipas ligjit për procedurat tatimore deri në fund të vitit 2022.
Por një vendim i tillë për shtyrjen e afatit të fiskalizimit nuk është mirpritur nga ekspertët. Ata argumentojnë se shtyrja e afatit do të dëmtojë procesin dhe sidomos bizneset e mëdha që kanë filluar lëshimin e faturave elektronike me kohë.
Të dhënat e drejtorisë së Përgjithshme të Tatimeve theksojnë se procei I fiskalizimit ka nisur të japë efekte positive në uljen e informalitetit në ekonominë shqiptare.
