Braktisja e qenit, maces apo çdo kafshe tjetër mund të të çojë pas hekurave.
Kjo është një nga risitë e draftit të ri të Kodit Penal, i cili është prezantuar ditët e fundit në Tiranë dhe ndodhet aktualisht në fazën e konsultimeve publike.
Projektligji përfshin për herë të parë një kapitull të veçantë për mbrojtjen e kafshëve dhe ashpërson ndëshkimet për çdo formë abuzimi, keqtrajtimi apo braktisjeje.
Sipas nenit 944, braktisja e një kafshe, nëse rrezikon jetën apo shëndetin e saj, konsiderohet vepër penale dhe dënohet me gjobë ose me burgim deri në tre vite.
Po kaq burg parashikohet edhe në nenin 943 për rastet kur një kafshë dëmtohet rëndë apo i shkaktohet dhimbje përmes veprimeve brutale, përfshirë edhe akte me natyrë seksuale.
Nëse nga keqtrajtimi vjen edhe ngordhja e kafshës, dënimi rritet me 50%.
Nga drafti i ri nuk shpëtojnë pa ndëshkim as pronarët që nuk i mbajnë kafshët nën kontroll në hapësira publike.
Nëse një kafshë, për shkak të mungesës së kontrollit apo maskës mbrojtëse, shkakton dëmtime ndaj një personi, pronari rrezikon nga gjobë deri në 6 muaj burg.
Në raste më të rënda, kur dëmtimi është i thellë apo ka pasoja fatale, ndëshkimi rritet ndjeshëm.
Një tjetër pikë është ndalimi i organizimit të ndeshjeve ndërmjet kafshëve në nenin 946 të Kodit.
Organizatorët, promovuesit apo edhe ata që vendosin baste për këto përballje, mund të dënohen nga disa muaj deri në 6 muaj burg.
Ky nen ruan të njëjtat masa ndëshkimi si Kodi aktual i miratuar në vitin 19995, por është rikthyer në fokus për shkak të rasteve të ndodhura më parë.Dënimet shtohen ndjeshëm nëse veprat penale kryhen me mizori, për qëllime fitimi, në prani të fëmijëve apo gjatë ngjarjeve publike.
Në të gjitha këto raste, dënimi mund të rritet deri në 50%.
Drafti i Kodit të ri Penal është ende në diskutim dhe pritet të kalojë në Parlament pas përfundimit të procesit të konsultimit publik.
