Detaje të reja kanë dalë në dritë lidhur me ngjarjen e rëndë të ndodhur në Baldissero d’Alba të provincës së Cuneos në Itali, ku 35-vjeçari Roberto Mollo qëlloi për vdekje një 36-vjeçar me origjinë shqiptare gjatë një tentative për vjedhje. Autori i ngjarjes, i cili po hetohet nga Prokuroria e Astit, ka deklaruar para hetuesve se është mjaft i dëshpëruar për atë që ka ndodhur.
Sipas verifikimeve të fundit nga autoritetet italiane, Mollo ndodhej në pjesën e banueshme të shtëpisë së familjes — e cila ishte në proces rikonstruksioni — kur dëgjoi zhurma të dyshimta në oborr. Pasi mori pistoletën që e posedonte me leje të rregullt ligjshme, ai doli për të kontrolluar hapësirën jashtë dhe u përball në errësirë me një grup prej 4 deri në 5 personash. 35-vjeçari qëlloi disa herë në drejtim të tyre, duke plagosur për vdekje njërin nga anëtarët e grupit, ndërsa të tjerët u larguan me shpejtësi.
Hetimet e kryera në vendngjarje konfirmuan se grupi i personave të paautorizuar nuk arriti të merrte asnjë send apo material ndërtimi nga prona. Ishin vetë thirrjet e Mollos për ndihmë që alarmuan policinë dhe urgjencën mjekësore, mirëpo ekipet e ndërhyrjes nuk mundën të shpëtonin jetën e 36-vjeçarit shqiptar. Ndërkohë, karabinierët po vijojnë kërkimet intensive për identifikimin dhe kapjen e pjesëtarëve të tjerë të grupit që u larguan nga vendngjarja.
