Shërbimet e Policisë në Gramsh arrestuan në flagrancë shtetasin F. S., 26 vjeç, dhe referuan materialet për procedim penal ndaj babait të tij, R. S., 70 vjeç, pasi u kapën duke ndezur zjarr në një zonë pyjore në fshatin Bersnik i Poshtëm, njësia administrative Kodovjat.
Për shkak të përhapjes së flakëve, u dogj një sipërfaqe pylli dhe u rrezikuan banesat përreth. Ngjarja është regjistruar nën akuzën për veprën penale “Shkatërrimi me zjarr i pyjeve dhe i mjedisit pyjor”.
Policia e Elbasanit apelon qytetarët të shmangin zjarrvëniet dhe t’i raportojnë menjëherë rastet në numrin 112. U garantohet reagim i shpejtë, i paanshëm dhe ruajtje e anonimatit.
