Pas një ndërhyrjeje intensive që zgjati 48 orë pa ndërprerje, Shoqëria Rajonale Ujësjellës Kanalizime Elbasan ka finalizuar me sukses punimet në linjën kryesore të transmetimit, duke bërë të mundur rikthimin e plotë të furnizimit me ujë në zonat e prekura.
Sipas njoftimit zyrtar, ndërhyrja është konsideruar ndër më të vështirat për shkak të kompleksitetit teknik dhe rëndësisë së sistemit të transmetimit. Ekipet teknike kanë punuar pa ndërprerje deri në eliminimin e defektit dhe normalizimin e rrjetit.
Përfaqësues të shoqërisë theksuan se ndërhyrja ishte e domosdoshme për të garantuar funksionimin e sigurt dhe të qëndrueshëm të sistemit të furnizimit me ujë, ndërsa falënderuan qytetarët për mirëkuptimin dhe durimin gjatë periudhës së ndërprerjes.
Gjithashtu, një vlerësim i veçantë iu dha stafit teknik dhe punonjësve të angazhuar në terren, për profesionalizmin dhe përkushtimin e treguar gjatë gjithë operacionit.
