Elbasan, 23 qershor 2025 – Drejtoria Vendore e Policisë Elbasan ka vijuar me intensifikimin e kontrolleve dhe veprimeve procedurale në kuadër të parandalimit dhe goditjes së veprimtarisë së paligjshme në territorin e saj.
Komisariati i Policisë Cërrik ka realizuar:
Arrestimin në flagrancë të shtetasit N. T., 59 vjeç, pasi gjatë një konflikti për motive të dobëta ka shtyrë fqinjën e tij, R. S., 62 vjeçe, duke shkaktuar rrëzimin dhe dëmtimin e saj të lehtë.
Nisjen e procedimit penal për shtetasin M. P., 36 vjeç, i dyshuar për goditje me grushte ndaj shtetasit L. Xh., 40 vjeç, pas një debati.
Procedim penal për ndërtime pa leje ndaj shtetasit I. K., 43 vjeç, i kapur në flagrancë duke kryer punime ndërtimore pa autorizim ligjor.
Komisariati i Policisë Elbasan ka referuar në Prokurori:
Çështjen ndaj dy vëllezërve, K. P., 48 vjeç dhe D. P., 32 vjeç, të dyshuar për dhunë fizike me sende të forta ndaj shtetasit D. H., 26 vjeç.
Shtetasin I. B., për ushtrim dhune psikologjike ndaj bashkëshortes së tij, e cila tashmë është pajisur me urdhër mbrojtjeje.
Sektori i Qarkullimit Rrugor ka proceduar penalisht shtetasin I. M., 53 vjeç, pas një aksidenti të ndodhur në aksin “Qafë Thanë–Librazhd”, ku automjeti i tij u përplas me një tjetër mjet të drejtuar nga G. Sh., 43 vjeç. Si pasojë, u dëmtuan lehtë vetë drejtuesi I. M. dhe dy pasagjerë në mjetin tjetër. Të lënduarit ndodhen jashtë rrezikut për jetën.
Komisariati i Policisë Peqin ka shpallur në kërkim shtetasin G. M., 26 vjeç, i dyshuar për vjedhjen e portofolit të një qytetari. Vijojnë hetimet për lokalizimin dhe arrestimin e tij.
Ngjarje të tjera:
Më datë 22 qershor 2025, në banesën e shtetases F. G., dyshohet se si pasojë e një defekti teknik në sistemin e kondicionimit, ka rënë zjarr që ka shkaktuar dëme materiale. Ngjarja po trajtohet si aksidentale.
Të gjitha materialet procedurale janë referuar pranë Prokurorisë së Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme në përputhje me ligjin.
