Një ngjarje me pasoja të rënda u regjistrua mbrëmjen e së dielës në qytetin e Korçës, ku dy persona mbetën të plagosur me thikë pas një konflikti të ndodhur në ambientet e një lokali. Sipas informacioneve paraprake, ngjarja ndodhi rreth orës 21:30 në lagjen nr. 1 të qytetit, ku një përplasje për motive të dobëta mes disa personave degjeneroi në dhunë fizike.
Të plagosurit, identifikuar si shtetasit S. Sh. dhe M. Xh., dyshohet se janë goditur me mjet prerës dhe u transportuan menjëherë në spitalin rajonal, ku po marrin trajtim mjekësor. Burime nga spitali bëjnë me dije se ata ndodhen jashtë rrezikut për jetën.
Menjëherë pas njoftimit, forcat e rendit ndërhynë në vendngjarje dhe shoqëruan në Komisariat tre shtetas të tjerë të përfshirë në konflikt, të identifikuar si I. Sh., D. P. dhe G. D., të dyshuar si autorë të plagosjes.
Grupi hetimor, nën drejtimin e Prokurorisë së Rrethit Gjyqësor Korçë, ka nisur punën për sqarimin e plotë të rrethanave të ngjarjes dhe identifikimin e shkakut që çoi në përshkallëzimin e konfliktit.
Hetimet janë në vijim.
