25 Nëntor 2025, 10:25 – Fier – Një ngjarje e rëndë ka ndodhur mëngjesin e sotëm në lagjen “15 Tetori” në qytetin e Fierit, ku një banesë ka rënë pre e flakëve. Shkaku i zjarrit dyshohet të jetë një shkëndijë elektrike, e cila ka shkaktuar djegien e pjesëve të brendshme të banesës.
Për pasojë, një foshnjë vetëm 2 muajshe ka pësuar lëndime dhe është dërguar menjëherë në spital për kujdes mjekësor. Sipas njoftimit të policisë, fëmija është jashtë rrezikut për jetën dhe ndodhet nën mbikëqyrjen e mjekëve.
Specialistët për Hetimin e Krimeve të Komisariatit të Policisë Fier kanë referuar materialet në Prokurori për vlerësim të mëtejshëm, ndërkohë që hetimet për rrethanat e ngjarjes vazhdojnë.
“Specialistët për Hetimin e Krimeve të Komisariatit të Policisë Fier referuan materialet në Prokurori, për vlerësim, pasi në lagjen “15 Tetori”, dyshohet se për shkak të një shkëndije elektrike, ka rënë zjarr në banesën e shtetasit L. L., dhe për pasojë është dëmtuar një fëmijë 2 muajsh, i cili ndodhet në kujdesin e mjekëve, jashtë rrezikut për jetën“, thuhet në njoftimin e policisë.
