Brod, Kosovë | 28 gusht 2025 – Një ngjarje shqetësuese ka ndodhur pasditen e së martës në fshatin Brod të komunës së Dragashit, ku një fëmijë 5-vjeç është sulmuar nga një ujk teksa ndodhej në oborrin e shtëpisë së tij.
Sipas njoftimit të Policisë së Kosovës, sulmi ka ndodhur rreth orës 19:00 në lagjen “Coklarë”. Fëmija ka pësuar plagë në shpinë dhe gjoks si pasojë e sulmit të kafshës së egër.
Pas ngjarjes, i mituri është transportuar fillimisht në një spital lokal ku ka marrë ndihmën e parë mjekësore, ndërsa më pas është transferuar në Prishtinë për trajtim të specializuar.
Drejtori i Klinikës në Prishtinë, dr. Nazmi Kolgeci, ka konfirmuar se gjendja e fëmijës është aktualisht stabile.
“Gjendja është stabile për momentin, por është duke u monitoruar nga ekipi mjekësor. Janë kryer të gjitha ekzaminimet e nevojshme dhe kemi kontaktuar edhe ekipin e epidemiologjisë. Pacienti do të qëndrojë rreth një javë në klinikën tonë për trajtim të mëtejshëm. Lëndimet i ka në gjoks dhe në shpinë”, deklaroi Kolgeci.
Autoritetet nuk kanë dhënë ende detaje mbi rrethanat se si ujku arriti të depërtojë në zonën e banuar, ndërsa pritet një reagim nga institucionet përgjegjëse për kontrollin e faunës së egër.
