TIRANË- Të shënat e fundit nga Eurostat kanë treguar se 86% e qytetarëve në Shqipëri janë përdorues të internetit, ndërsa tek të rinjtë e moshës 16-29 vjeç ky numër arrin mbi 99%, duke kaluar me 2% më shumë mesataren e Bashkimit Europian, e cila qëndron në 97%.
Në Shqipëri, ashtu si në vendet e BE-së, të rinjtë kanë shumë më tepër gjasa të jenë aktivë në rrjetet sociale krahasuar me popullsinë e përgjithshme. Krijimi i profileve personale, postimi i mesazheve dhe aktivitetet online mbeten ndër praktikat më të përhapura në mesin e kësaj grupmoshe.
Megjithatë në Shqipëri, vetëm 49% e të rinjve zotërojnë aftësi bazë të teknologjisë së informacionit dhe komunikimit (TIK), ndërsa mesatarja europiane arrin në 71%. Këto aftësi konsiderohen thelbësore për të përfituar plotësisht dhe për të kontribuar në aktivitetet e bazuara në internet.
Sipas Eurostat, në BE shumica e të rinjve, sapo përfundojnë arsimin e detyrueshëm, kanë përdorur rregullisht kompjuterët dhe internetin për një gamë të gjerë aktivitetesh, duke krijuar një bazë solide për zhvillimin e aftësive digjitale.
