Cërrik, 7 mars 2025 – Një ngjarje e rëndë ka ndodhur në fshatin Gjyralë, ku një person është plagosur me thikë pas një konflikti të çastit. Si rezultat i veprimeve të shpejta dhe profesionale të policisë, autori i dyshuar është kapur dhe arrestuar menjëherë pas ngjarjes.
Policia e Cërrikut njoftoi se, menjëherë pas incidentit, shërbimet e Komisariatit të Policisë kanë organizuar veprimet e nevojshme për të zbardhur rrethanat e ngjarjes dhe për të kapur autorin. Autori i dyshuar, shtetasi U. Ll., 24 vjeç, banues në Cërrik, dyshohet se gjatë një konflikti për motive të dobëta, ka tentuar të vrasë me thikë shtetasin S. Rr., 37 vjeç.
Për fat të mirë, i plagosuri është jashtë rrezikut për jetën dhe ndodhet aktualisht nën kujdesin e mjekëve. Pas ndihmës mjekësore, u konstatua se i plagosuri mbante në automjet një shkop bejsbolli, të cilin policia e ka sekuestruar si pjesë të hetimeve. Po ashtu, u sekuestrua edhe mjeti prerës (thika) dhe automjeti i të plagosurit.
Policia e Cërrikut ka proceduar autorin për veprën penale të tentativës për vrasje dhe ka dorëzuar materialet për veprime të mëtejshme në Prokurorinë e Elbasanit.
