Blue Origin ka njoftuar një ndryshim të rëndësishëm strategjik, duke konfirmuar se do të pezullojë fluturimet e raketës suborbitale New Shepard për të paktën dy vitet e ardhshme. Vendimi shënon një kthesë të fortë për kompaninë hapësinore, e cila u bë e njohur globalisht për fluturimet turistike drejt kufirit të hapësirës.
Që nga misioni i parë me ekuipazh në vitin 2021, New Shepard ka transportuar dhjetëra persona në fluturime të shkurtra rreth 10-minutëshe. Raketat kanë pasur në bord figura të njohura si themeluesi i kompanisë Jeff Bezos, aktori William Shatner, këngëtarja Katy Perry, gazetarja Gayle King dhe ish-ylli i NFL-së Michael Strahan.
Megjithatë, kompania ka vendosur të ndryshojë prioritetet.
Në një deklaratë zyrtare, Blue Origin tha se po ndalon fluturimet turistike për të përqendruar burimet në përshpejtimin e zhvillimit të kapaciteteve për uljen e astronautëve në Hënë. Vendimi vjen në një moment kur presioni ndaj industrisë hapësinore amerikane është rritur, për shkak të konkurrencës globale dhe objektivave ambicioze të eksplorimit.
Fokus te programi hënor i NASA-s
Blue Origin është një nga dy kompanitë private që kanë kontrata me NASA-n për zhvillimin e mjeteve të uljes në Hënë, në kuadër të programit Artemis. Aktualisht, SpaceX është parashikuar të ofrojë mjetin për misionin Artemis III, por vonesat e mundshme kanë hapur skenarë alternativë.
Zyrtarë amerikanë kanë theksuar se SHBA nuk mund të lejojë vonesa që rrezikojnë epërsinë në garën hapësinore, veçanërisht përballë Kinës, e cila synon uljen e astronautëve të saj në Hënë deri në vitin 2030.
Në këtë kontekst, pezullimi i fluturimeve turistike shihet si një riorganizim strategjik dhe jo si tërheqje. Blue Origin thekson se objektivi kryesor mbetet kthimi i njerëzimit në Hënë dhe ndërtimi i një pranie të qëndrueshme atje.
Çfarë ndodh me turizmin hapësinor?
Ende nuk dihet sa persona kanë bileta të rezervuara për fluturimet e ardhshme të New Shepard dhe si do të trajtohen vonesat. Çmimet e biletave nuk janë bërë kurrë publike.
Deri tani, New Shepard ka transportuar 98 persona përtej vijës Kármán, kufiri i njohur ndërkombëtarisht i hapësirës. Për momentin, këto përvoja mbeten të pezulluara, ndërsa Blue Origin synon të luajë një rol kyç në të ardhmen hënore të njerëzimit.
