Shkodër, 7 dhjetor 2025 – Policia e Shkodrës ka vënë në pranga 17-vjeçarin Danjel Ndreu, i cili ishte shpallur në kërkim si i dyshuar për bashkëpunim në atentatin e ndodhur më 8 shtator në qendër të qytetit, ku humbën jetën Liridon Kraja dhe Armando Pali.
Sipas policisë, i mituri u ndalua gjatë një kontrolli rutinë, ku efektivët gjetën edhe disa doza lënde narkotike të dyshuara si kokainë. Autoritetet bëjnë të ditur se Ndreu ishte gjithashtu i shpallur në kërkim për vjedhjen e një motoçiklete në muajin gusht.
Si ndodhi atentati i 8 shtatorit
Sipas hetimeve, Armando Pali dhe Erogen Brajoviç po konsumonin kafe në një lokal pranë Bashkisë së Shkodrës, kur mbi ta u qëllua me breshëri nga Ragip Gila. Shënjestra e dyshuar e sulmit ishte Brajoviç, i cili mbeti i plagosur nga tre plumba.
Nga të shtënat humbën jetën menjëherë Armando Pali dhe truproja i Brajoviçit, Liridon Kraja, i njohur si Lushi, 31 vjeç. Ky i fundit ndërroi jetë në spital si pasojë e plagëve të marra. Në atentat u plagosën gjithashtu Erogen Brajoviç dhe kamarierja e lokalit, 25-vjeçarja Meri Kaceri.
Policia po vijon hetimet për zbardhjen e plotë të ngjarjes dhe rolin e mundshëm të Ndreut në atentat.
