Një person humbi tragjikisht jetën këtë të hënë në Shkodër, ndërsa tre të tjerë u plagosën si pasojë e një aksidenti të rëndë, të ndodhur rreth orës 12:10.
Sipas policisë, një kamion u përplas me dy automjete në rrethana momentalisht të paqarta.
Përplasja ka qenë aq e fortë, sa njëra prej makinave u shkatërrua plotësisht.
“Rreth orës 12:10, në aksin rrugor ‘Shkodër-Lezhë’, kamioni me drejtues shtetasin H. Sh. është përplasur me automjetin me drejtues shtetasin A. L. dhe më pas me automjetin me drejtuese shtetasen A. H. Si pasojë e aksidentit ka humbur jetën një shtetas ende i paidentifikuar dhe janë dëmtuar 3 shtetas, të cilët janë në kujdesin e mjekëve, jashtë rrezikut për jetën. Grupi hetimor vijon punën për zbardhjen e rrethanave të aksidentit”, thuhet në një njoftim paraprak të Policisë së Shkodrës.
