LAÇ, 21 qershor 2026 – Një aksident me pasojë fatale është regjistruar mesditën e së dielës në aksin e vjetër rrugor Fushë-Krujë–Laç, ku një motoçiklist ka humbur jetën në vendngjarje pas përplasjes me një automjet.
Sipas informacioneve paraprake, një automjet tip “Benz”, i drejtuar nga 24-vjeçari Luljan Vena, është përplasur me një motoçikletë me drejtues shtetasin Gjin Kola.
Përplasja ka rezultuar fatale për drejtuesin e motoçikletës, i cili ka ndërruar jetë menjëherë në vendin e ngjarjes për shkak të plagëve të marra.
Menjëherë pas aksidentit, në vendngjarje kanë mbërritur shërbimet e Policisë Rrugore dhe grupi hetimor, të cilët kanë kryer veprimet e para procedurale dhe kanë shoqëruar drejtuesin e automjetit në komisariat për sqarimin e rrethanave.
Burime paraprake bëjnë me dije se hetimet po përqendrohen te pakujdesia e mundshme e drejtuesit të automjetit, ndërsa pritet ekspertiza për të përcaktuar shkaqet e sakta të aksidentit.
Autoritetet vijojnë punën për dokumentimin e plotë të ngjarjes.
