Një aksident i rëndë ka ndodhur mbrëmjen e sotme në autostradën Lushnjë-Fier, ku raportohet se një person ka ndërruar jetë.
Mësohet se ngjarja ka ndodhur në kryqëzimin e Savrës, ku raportohet se mjeti tip Ford ka përplasur për vdekje një këmbësor që kalonte në autostradë me një karrocë dore. Viktima është identifikuar si Hasan Selimi 65 vjeç banues ne Savër.
Policia ndodhet në vendngjarje për të disiplinuar trafikun dhe për të zbardhur shkaqet e aksidentit. Paraprakisht dyshohet se i viktima i ka prerë rrugën mjetit në autostradë.
Njoftimi i policisë:
Rreth orës 20:20, në aksin rrugor “Lushnjë-Fier”, shtetasi A. F., 55 vjeç, duke drejtuar një automjet tip “Ford”, ka aksidentuar këmbësorin, shtetasin H. S., rreth 65 vjeç.
Si pasojë e aksidentit, ka ndërruar jetë shtetasi H. S.
Drejtuesi i automjetit, shtetasi A. F., është shoqëruar në Komisariat nga shërbimet e Policisë, për veprime të mëtejshme.
Grupi hetimor po punon për sqarimin e plotë të rrethanave të aksidentit.
