Një ngjarje tragjike është regjistruar në një kantier ndërtimi në Vjenë, ku shembja e një pjese të konstruksionit ka sjellë humbjen e jetës për katër punëtorë. Aksidenti ndodhi në zonën e Alsergrundit, gjatë orarit të punës, kur një segment i skelave u rrëzua papritur, duke zënë poshtë disa persona që ndodheshin në vendin e punimeve.
Si pasojë e incidentit, punëtorët ranë në oborrin e një ndërtese të vjetër, ndërsa tre prej viktimave u identifikuan si shtetas nga Kosova: Pajtim Bajrami, Asllan Musliu dhe Istref Zekaj, të cilët humbën jetën në vend. Viktima e katërt ishte një punëtor tjetër, identiteti i të cilit nuk është bërë ende publik.
Ambasada e Kosovës në Austri konfirmoi se tre prej të ndjerëve janë shqiptarë nga Kosova. Ndërkohë, autoritetet austriake kanë nisur hetimet për të sqaruar rrethanat dhe shkaqet që çuan në këtë aksident fatal, si dhe për të përcaktuar përgjegjësitë përkatëse. Ngjarja ka shkaktuar tronditje dhe reagime të shumta në komunitetin shqiptar që jeton në Austri, ndërsa familjarët e viktimave kanë marrë mesazhe të shumta ngushëllimi.
Një prej viktimave, Asllan Musliu, ishte veteran i Ushtrisë Çlirimtare të Kosovës. Lajmi për ndarjen e tij nga jeta u bë publik nga familjarë dhe miq përmes njoftimeve mortore në rrjetet sociale. Gjatë luftës së fundit në Kosovë, ai kishte qenë pjesë e Drejtimit Taktik nr. 2 në operacionin “Shigjeta”.
Zjarrfikësit raportuan se operacioni i shpëtimit u përball me vështirësi të mëdha për shkak të hapësirës së kufizuar në oborr dhe sasisë së madhe të rrënojave. Niveli i alarmit u ngrit në shkallën e dytë, duke bërë të nevojshëm angazhimin e forcave shtesë. Në vendngjarje ndërhynë rreth 120 efektivë me afro 30 mjete të zjarrfikësve dhe mbrojtjes civile.
Për të arritur te punëtorët e bllokuar, ekipet u detyruan të krijonin hyrje të reja duke hequr gardhe dhe dyer, si edhe duke larguar pjesët e skelave të rrëzuara dhe armaturat metalike. Një sfidë e veçantë ishte edhe pastrimi i betonit ende të lëngshëm, i cili u hoq manualisht. Pas rreth dy orë e gjysmë ndërhyrjesh intensive, trupat e katër punëtorëve u nxorën nga rrënojat, por fatkeqësisht ata u konstatuan pa shenja jete.
