Një aksident i pazakontë ka ndodhur pasditen e djeshme, më 22 nëntor, në fshatin Klos të Elbasanit, ku një automjet që udhëtonte në rrugën Mollas–Klos humbi kontrollin dhe përfundoi brenda një lokali në qendër të fshatit.
Sipas dëshmive nga vendngjarja, mjeti po lëvizte me shpejtësi shumë të lartë kur shoferi ka humbur kontrollin, duke e bërë automjetin të përplaset dhe të “fluturojë” drejt ambienteve të brendshme të lokalit. Fatmirësisht, brenda ndodheshin vetëm dy persona, të cilët arritën të shmangnin përplasjen e drejtpërdrejtë dhe kanë pësuar vetëm lëndime të lehta.
Banorët e zonës shprehen se ngjarja mund të kishte pasuar pasoja tragjike, duke rikthyer vëmendjen te problemet me shpejtësinë e lartë në zona të banuara. Ata bëjnë thirrje për ndërgjegjësim të drejtuesve të mjeteve dhe masa më të rrepta nga institucionet për kontrollin e shpejtësisë, sidomos në kryqëzime dhe zona të populluara.
Ndërkohë, personat që ndodheshin në automjet raportohet se janë në gjendje të rëndë dhe po marrin trajtim mjekësor në spital.
Ngjarja po hetohet nga policia për të përcaktuar rrethanat dhe shkaqet e aksidentit.
Shkruan një dëshmitar në ngjarje:
Ajo që ka ndodhur dje më datë 22 nëntor në fshatin Klos të Elbasanit, është e pabesueshme. Si në një skenë filmi , automjeti që udhëtonte në rrugën Mollas-Klos me shpejtësi marramendëse, ka dal nga kontrolli i drejtuesit dhe ka “fluturuar” në lokalin që ndodhet në kryqëzimin e fshatit Klos. Fatmirësisht brënda lokalit ndodheshin vetëm dy persona të cilët kanë arritur te shmangnin tragjedinë dhe kanë marrë vetëm plagë të lehta.
Ky post po publikohet në menyrë sensibilizimi për të ndërgjegjësuar drejtuesët e automjeteve sadopak.
Rruga nuk është pistë garash. Të gjithë ne dëshirojmë në mbrëmje të kthehemi në shtëpitë dhe familjet tona. Është e pallogjikshme që në një kryqëzim, në qëndër të banuar, automjetet të udhëtojnë me shpejtësi aq te lartë. Është e qartë që institucionet duhet të marrin masa të rrepta por përpara se te akuzojmë të tjerë, duhet që ne si popull te ndërgjegjësohemi. Askush nuk ka të drejtë te marrë jetë njerëzish thjesht për kapriçot e tyre prej “piloti” në rrugë publike.
Ps: Shpresoj që dhe personat që ndodheshin në automjet, (e keqja nuk i urohet askujt) të cilët për momentin ndodhen në spital në gjendje të rëndë sipas dëshmive, të shërohen sa më shpejt dhe të kthehen në familjet e tyre.
