Një akt guximi i jashtëzakonshëm i një të riu shqiptar ka marrë vëmendjen e gjithë Italisë. Kryeministrja Giorgia Meloni ka përshëndetur publikisht Elton Zefin, 32 vjeç, i cili shpëtoi një 85-vjeçar italian nga mbytja pasi makina e tij ra në ujërat e kanalit Battaglia në Padova.
Në një postim në Instagram, Meloni e cilësoi shqiptarin “hero”, duke theksuar se “një jetë u shpëtua falë guximit dhe altruizmit të atyre që vendosën të ndërhyjnë”. Ajo nënvizoi se veprime të tilla tregojnë vlerat e larta njerëzore dhe reagimin e menjëhershëm në momentet kritike.
Ngjarja ndodhi kur automjeti i biznesmenit 85-vjeçar Giuseppe Salvalajo doli nga rruga dhe përfundoi në kanal, duke rrezikuar të fundoset plotësisht. Elton Zefi, që ndodhej pranë vendit të ngjarjes, u hodh pa hezitim në ujë dhe, së bashku me një person tjetër që u afrua për ndihmë, arriti të çojë të moshuarin në breg në gjendje të sigurt.
Autoritetet italiane e kanë vlerësuar ndërhyrjen e tij si jetike dhe thelbësore për shpëtimin e 85-vjeçarit, ndërsa mediat vendase e kanë përshkruar Zefin si një simbol të solidaritetit dhe trimërisë.
