ITALI- Gjykata e Apelit e Bolonjës e uli nga 17 në 15 vjet dënimin për autorin e vrasjes së Aurora Tilës, 13-vjeçares shqiptare që humbi jetën më 25 tetor 2024 në Piacenza, pasi ish i dashuri e hodhi nga ballkoni. Gjatë një interviste në emisionin “Verissimo”, Morena Corbellini, nëna e vajzës foli për vendimin. Ajo tha se momenti kur u shpall verdikti mbetet më i vështiri.
“Kur u lexua dënimi, ndjeva dhimbje të madhe, dhimbje të pafundme, një disfatë. Besoja aq shumë në drejtësi, dhe sot nuk besoj më në të . Ka aq shumë zhgënjim dhe aq shumë zemërim.”- thotë nëna e vajzës, duke përshkruar një rënie jo vetëm personale, por edhe të besimit në institucione.
Më tej ajo thekson se dënimi me 15 vite burg i autorit është i papranueshëm. Pasi doli nga salla e gjyqit, hapi i saj i parë ishte të kthehej në hapësirën më private të shtëpisë së saj.
“Shkova në dhomën e saj për të kërkuar falje sepse nuk mora atë që doja”, – rrëfen ajo, duke iu referuar dhomës së gjumit që la pas. Pavarësisht gjithçkaje, ajo nuk e konsideron udhëtimin e saj të mbaruar.
“Beteja nuk ka mbaruar. Dua të kuptoj pse dënimet janë kaq të ulëta për ata që vrasin”, tha ajo.
