Zjarr masiv në një ullishte në Balëz të Elbasanit – Vështirësi në ndërhyrje për shkak të terrenit

Elbasan, 1 korrik 2025 – Një zjarr i madh ka përfshirë një sipërfaqe të konsiderueshme me ullinj në fshatin Balëz, në afërsi të Elbasanit, këtë të martë paradite.

Sipas të dhënave paraprake, flakët kanë shpërthyer rreth orës 11:55 dhe janë përhapur me shpejtësi për shkak të erërave të forta dhe temperaturave të larta, që po dominojnë zonën.

Në vendngjarje ndodhen forcat zjarrfikëse, të cilat po punojnë për izolimin e vatrës së zjarrit. Megjithatë, ndërhyrja është e vështirësuar për shkak të terrienit të thepisur malor, që e bën të pamundur përdorimin e mjeteve të rënda.

Deri në këto momente nuk raportohet për rrezik ndaj banesave apo jetëve njerëzore, por flakët po vijojnë të përhapen në zonën me ullishte, duke shkaktuar dëme në sipërfaqe me bimësi të dendur.

Autoritetet vendore bëjnë thirrje për kujdes dhe bashkëpunim nga banorët, ndërsa vijon puna për lokalizimin dhe neutralizimin e zjarrit.