Belsh, 21 korrik 2025 – Dy vatra të fuqishme zjarri përfshinë për rreth nëntë orë një sipërfaqe të konsiderueshme në territorin e Bashkisë Belsh dhe Njësisë Administrative Rrasë, duke rrezikuar seriozisht zonat me bimësi natyrore, ullishte dhe sipërfaqe të mbjella me kultura bujqësore.
Sipas të dhënave zyrtare, flakët dogjën rreth 40 hektarë tokë, përfshirë një numër të madh ullinjsh shumëvjeçarë, të konsideruar me rëndësi të veçantë për ekonominë lokale. Era e fortë dhe terreni i thepisur e vështirësuan ndërhyrjen, por falë një operacioni të gjerë dhe të koordinuar, u bë e mundur izolimi dhe shuarja e plotë e zjarrit, duke shmangur një katastrofë mjedisore dhe ekonomike.
Në përballjen me flakët u angazhuan mbi 100 forca të ndryshme operacionale, përfshirë:
10 mjete zjarrfikëse dhe efektivë të MZSH nga Belshi, Peqini, Lushnja, Berati dhe Kuçova
Ekipet e Ushtrisë dhe Forcave të Armatosura,
Policia e Shtetit,
Punonjës të Bashkisë Belsh dhe banorë vullnetarë,
Si dhe 2 helikopterë të Emergjencave Civile.
Një rol vendimtar në përballimin e situatës luajtën edhe bashkitë fqinje – Gramsh, Kuçovë, Cërrik, Lushnje, Berat dhe Peqin – të cilat kontribuan me mjete zjarrfikëse dhe personel të specializuar, duke garantuar ndërhyrje më të shpejtë dhe efektive.
Pas shuarjes së flakëve, autoritetet lokale vijojnë monitorimin e zonës për çdo rrezik të mundshëm rindezjeje dhe kanë nisur procesin e vlerësimit të dëmeve.
Kryetari i Bashkisë Belsh, në një deklaratë për mediat, shprehu mirënjohjen për të gjithë ata që u angazhuan në këtë operacion:
“Sakrifica dhe përkushtimi i zjarrfikësve, ndihma e bashkive fqinje dhe qytetarëve tanë, treguan edhe një herë forcën e solidaritetit në kohë të vështira. I falënderoj të gjithë për angazhimin dhe vendosmërinë,” – deklaroi ai.
Bashkia Belsh i bën thirrje qytetarëve për kujdes maksimal gjatë muajve të verës, duke shmangur çdo veprim që mund të shkaktojë zjarr në natyrë dhe duke njoftuar menjëherë autoritetet në rast rreziku.
