Pallati i Kulturës “Sadi Halili” në Librazhd u shndërrua më 22 janar 2026 në një hapësirë reflektimi, arti dhe harmonie, gjatë zhvillimit të veprimtarisë artistiko-sociale “Zërat e Paqes”, organizuar nga Këshilli i Paqes Librazhd me mbështetjen e Bashkisë Librazhd.
Aktiviteti mblodhi rreth 120 Ambasadorë për Paqe, përfaqësues të institucioneve vendore, personalitete të jetës publike dhe të rinj, duke përcjellë mesazhe të forta për bashkëjetesën, solidaritetin dhe rëndësinë e paqes në shoqëri. Përmes një ndërthurjeje të suksesshme mes fjalës dhe artit, veprimtaria krijoi një klimë të ngrohtë dhe përfshirëse për të gjithë pjesëmarrësit.
Nën moderimin e kujdesshëm dhe profesional të Ina Karamuçës dhe Artenisa Kujtilës, programi u hap me fjalën përshëndetëse të Kryetarit të Këshillit të Paqes Librazhd, z. Agim Kujtila, i cili vuri theksin te nevoja për kultivimin e vlerave të paqes dhe respektit të ndërsjellë në jetën komunitare.
Në vijim, të pranishmit u përshëndetën nga Kryetari i Federatës së Paqes Universale Shqipëri, z. Defrim Methasani, Kryetari i Këshillit Rajonal të Paqes Elbasan, z. Fatmir Popja, si dhe Sekretari i Përgjithshëm, z. Gani Rroshi. Aktiviteti u nderua edhe me praninë e nënkryetares së Federatës së Paqes, Dr. Saemira Pino.
Programi artistik, i kuruar nën drejtimin artistik të Shkëlqim Brahjas, u realizua nga talentet e reja të Librazhdit, të cilët sollën interpretime të ndryshme muzikore. Rigerta Kojku interpretoi këngën “Zare Trendafile”, Ajsi Bahiti këndoi “Kuturru”, Danjela Mojsja prezantoi një interpretim në gjuhën frënge, ndërsa Loria Pëllumbi dhuroi një serenatë me violinë. Emocionet u pasuruan më tej nga recitimi i një poezie kushtuar Skënderbeut, interpretuar nga regjisori dhe aktori i njohur Aqif Ademi.
Në përmbyllje të aktivitetit, 13 personalitete të Librazhdit u nderuan me titullin “Ambasador për Paqe”, si vlerësim për kontributin e tyre të vazhdueshëm në shërbim të komunitetit dhe shoqërisë.
Të vlerësuarit me titullin “Ambasador për Paqe” janë:
Azis Lushi (arsim)
Aurika Hoxha (arsim)
Aishe Kurti (artizane)
Ali Buzra (arsim)
Rrahman Gjeta (biznesmen)
Lefterie Hasa (arsim)
Dashurie Zani (laborante)
Shpëtim Cura (turizëm)
Skënder Karaj (arsim)
Shkëlqim Brahja (instrumentist)
Bardha Ndërgjoni (gazetare)
Lulzim Shahinaj (sipërmarrës)
Organizatorët shprehën mirënjohje të veçantë për Këshillin e Paqes Librazhd, si dhe për kryetarin z. Agim Kujtila dhe nënkryetaren znj. Fatbardha Alimeta, për përkushtimin dhe angazhimin e treguar në realizimin e një veprimtarie me vlera të larta kulturore dhe shoqërore.
