Cërrik – Një ngjarje e ndodhur gjatë orëve të natës në lagjen nr. 1 të qytetit të Cërrikut ka çuar në arrestimin e një 19-vjeçari të dyshuar për vjedhje. Shtetasi O. Z., banues në Cërrik, u vu në pranga nga shërbimet e Komisariatit të Policisë Cërrik, pasi u identifikua si autor i një vjedhjeje të ndodhur në një lokal, rreth mesnatës.
Sipas kallëzimit të bërë nga pronari i celularit, objekti u vjedh ndërsa ndodhej në ambientin e lokalit. Pas hetimeve të shpejta, policia arriti të identifikojë autorin dhe gjatë kontrollit në banesën e tij, u gjet dhe sekuestrua në cilësinë e provës materiale celulari i vjedhur.
Ndaj të riut janë nisur hetime të mëtejshme për të zbuluar nëse është i përfshirë në raste të tjera vjedhjeje në zonë. Materialet procedurale janë referuar në Prokurorinë pranë Gjykatës së Shkallës së Parë të Juridiksionit të Përgjithshëm Elbasan për vijimin e hetimeve.
