Prurjet e larta të lumit Vjosa gjatë natës kanë shkaktuar përmbytje të konsiderueshme në fshatin Ferras, në bashkinë Fier, ku 21 banesa janë përmbytur nga uji. Dëmet janë të shumta, me sipërfaqe të mëdha ullinjsh që janë nën ujë, shpendë të rrëmbyer nga vërshimi dhe rezerva ushqimore për bagëtinë që janë dëmtuar rëndë.
Banorët e Ferrasit janë të trembur nga rreziku i mundshëm që lumi të dalë nga shtrati, dhe kanë marrë masa emergjente për të mbrojtur familjet dhe pasurinë e tyre. Megjithatë, shumë prej tyre nuk janë përgjigjur thirrjes së autoriteteve për evakuim, edhe pse situata është monitoruar gjatë gjithë natës nga strukturat përkatëse.
Kryeplaku i Ferrasit, Zani Hyka, theksoi se 19 nga 21 banesat e përmbytura janë ende të banueshme, por ndodhen brenda argjinaturës së lumit, çka e bën të pashmangshme ekspozimin ndaj ujit në raste të tilla. Pavarësisht se niveli i ujit të lumit Vjosa ka filluar të bjerë, banorët mbeten të shqetësuar dhe të alarmuar, duke kujtuar përmbytjet e mëparshme që kanë ndodhur në vitet e kaluara.
Ata shprehin frikën se reshje të tjera mund të përkeqësojnë situatën dhe i gjetën të papërgatitur, pasi lumi Vjosa nuk kishte dalë nga shtrati për disa vjet. Autoritetet lokale po vazhdojnë të monitorojnë situatën dhe u bëjnë thirrje banorëve të ndjekin udhëzimet e ekipeve të emergjencës për të garantuar sigurinë e tyre.
