ROMË — Qeveria italiane e udhëhequr nga Kryeministrja Giorgia Meloni ka miratuar një dekret të ri që sjell ndryshime rrënjësore në sistemin arsimor publik, duke vendosur kufizime për numrin e nxënësve të huaj në çdo klasë si dhe ndalimin e mbulimit të fytyrës brenda ambienteve shkollore.
Sipas rregullave të reja që do të hyjnë në fuqi nga viti i ardhshëm shkollor, jo më shumë se 30 për qind e nxënësve në një klasë do të mund të jenë të huaj me njohuri të pamjaftueshme të gjuhës italiane. Kjo kuotë synon kryesisht fëmijët e sapoardhur. Nga ky kufizim përjashtohen fëmijët që kanë ndjekur të paktën dy vjet kopshtin në Itali për ciklin fillor, ose tre vjet shkollim italian për ciklet e mëtejshme.
Kryeministrja Meloni deklaroi se organizimi i balancuar i klasave është një instrument që nxit integrimin e mirëfilltë shoqëror. Paralelisht, dekreti ndalon mbulimin e fytyrës në shkolla, masë kjo që prek kryesisht mbulesat fetare si burka apo nikabi.
Rregullat e reja përfshijnë edhe prindërit e fëmijëve, të cilët do të jenë të detyruar të ndjekin kurse falas të gjuhës italiane nëse konstatohet se kanë vështirësi serioze në komunikimin me institucionet arsimore. Për ata që refuzojnë bashkëpunimin apo nuk i përmbahen kësaj mase, parashikohen gjoba financiare që variojnë nga 200 deri në 1,000 euro.
Ndërkohë, sindikatat e arsimit në Itali e kanë kritikuar dekretin duke e konsideruar atë si lëvizje politike që sjell vështirësi praktike në zbatim, në një kohë kur vendi përgatitet për zgjedhjet e ardhshme parlamentare.
