Prishtinë, 4 gusht 2025 – Presidentja e Republikës së Kosovës, Vjosa Osmani, ka reaguar me shqetësim të thellë pas thirrjeve raciste dhe antishqiptare që u dëgjuan gjatë ndeshjes së futbollit mes Maqedonisë së Veriut dhe Rumanisë, e zhvilluar në Kumanovë.
Në një deklaratë zyrtare, Osmani i cilësoi thirrjet si ekstreme dhe diskriminuese, duke i quajtur “të papranueshme dhe në kundërshtim të plotë me frymën e bashkëjetesës dhe respektit të ndërsjellë që duhet të karakterizojë çdo shoqëri me synime evropiane”.
Presidentja theksoi se shqiptarët janë popull autokton në trojet e tyre dhe meritojnë trajtim me dinjitet dhe barazi, njësoj si çdo komunitet tjetër në rajon. Më tej, ajo ngriti shqetësimin për heshtjen e institucioneve në Shkup, të cilat, sipas saj, nuk kanë reaguar përballë një gjuhe që nxit ndarje dhe përçarje.
“Edhe më shqetësuese është mungesa e një qëndrimi institucional ndaj kësaj gjuhe të urrejtjes. Kjo heshtje rrezikon të legjitimojë retorika që minojnë paqen dhe kohezionin ndëretnik”, thuhet në deklaratën e Presidentes.
Ajo theksoi gjithashtu se sporti duhet të shërbejë si urë bashkimi mes komuniteteve dhe jo si platformë për nxitje urrejtjeje. “Sporti duhet të frymëzojë solidaritet dhe mirëkuptim, jo të kthehet në arenë për ideologji përçarëse që risjellin kujtime të errëta të së kaluarës sonë,” u shpreh Osmani.
Në përmbyllje, Presidentja i bëri thirrje autoriteteve të Maqedonisë së Veriut që të marrin masa të menjëhershme ndaj organizatorëve dhe individëve përgjegjës, duke kërkuar ndëshkimin e çdo forme të gjuhës së urrejtjes dhe garantimin e vlerave të bashkëjetesës demokratike.
“Republika e Kosovës do të mbrojë me vendosmëri dinjitetin dhe të drejtat e shqiptarëve, kudo që ata jetojnë,” përfundoi ajo.
