Në kuadër të operacionit ndërkombëtar antidrogë të koduar “SACRIPANTE.AL”, zhvilluar në Shqipëri, është arrestuar 24-vjeçari shqiptar Klinder Luka, i dyshuar për pjesëmarrje në një grup kriminal që operonte në fushën e narkotikëve. Ky operacion është realizuar në bashkëpunim me autoritetet italiane dhe është iniciuar nga Prokuroria e Venecias në vitin 2022.
Gjatë operacionit, i udhëhequr nga Sektori për Hetimin e Grupeve Kriminale në Drejtorinë për Hetimin e Krimit të Organizuar, në bashkëpunim me DVP Lezhë dhe Zyrën e Interforcës Italiane në Shqipëri, u lokalizua dhe u arrestua Klinder Luka, i cili do të ekstradohet në Itali për t’u përballur me akuzat ndaj tij. Gjykata e Venecias kishte lëshuar një urdhër arresti për Lukën, mbi dyshimet për pjesëmarrje në një grup të strukturuar kriminal, veprimtari e cila është e ndaluar nga ligji italian, sipas parashikimeve të Kodit Penal italian (nenet 81, 110 dhe 73).
Në kuadër të operacionit, janë arrestuar gjithsej 10 shtetas në Itali, ndërsa Interpol Tirana po punon ngushtë me homologët italianë për të siguruar ekstradimin e Lukës. Ky operacion është një goditje tjetër e rëndësishme ndaj grupeve kriminale ndërkombëtare që operojnë në fushën e narkotikëve, duke treguar forcimin e bashkëpunimit ndërkombëtar në luftën kundër krimit të organizuar.
