7 Mars 2026
Në Ditën e Mësuesit, qyteti i Elbasanit i ka shprehur mirënjohje një prej figurave më të përkushtuara të arsimit, duke vlerësuar një rrugëtim profesional që ka lënë gjurmë të thella në edukimin e brezave.
Pas 40 vitesh të pandërprera në shërbim të arsimit, mësuesja Anila Çota mbyll këtë vit një kapitull të rëndësishëm të jetës së saj profesionale, teksa i afrohet pensionimit. Kjo shënon edhe 7 Marsin e saj të fundit në detyrë, një moment i mbushur me emocione, mirënjohje dhe respekt nga kolegët, nxënësit dhe komuniteti arsimor.
Në një ceremoni të veçantë, të organizuar nga stafi i shkollës “Qamil Guranjaku”, ku ajo ka dhënë një kontribut të vyer ndër vite, mësuesja Çota u surprizua me një vlerësim të lartë nga Bashkia e Elbasanit. Kryetari i bashkisë, Gledian Llatja, i dorëzoi asaj titullin “Mirënjohja e Qytetit”, si shenjë vlerësimi për përkushtimin dhe ndikimin e saj në arsim dhe në jetën shoqërore të qytetit.
Ky vlerësim iu akordua për kontributin e çmuar dhe shumëplanësh në edukimin e brezave, si dhe për rolin e saj në forcimin dhe zhvillimin e institucioneve arsimore në Elbasan.
Përgjatë karrierës së saj, përveçse në klasë si mësuese, Anila Çota ka mbajtur edhe detyra drejtuese në sistemin arsimor, duke shërbyer si drejtuese e Zyrës Vendore Arsimore në Elbasan. Në këtë rol, ajo ka dhënë një kontribut të rëndësishëm në përmirësimin dhe menaxhimin e procesit arsimor në qytet.
Edhe pse po mbyll një kapitull të gjatë në profesionin e saj, figura dhe përkushtimi i Anila Çotës mbeten një burim frymëzimi për kolegët dhe nxënësit. Puna dhe pasioni i saj për arsimin do të vijojnë të kujtohen si një shembull i vyer për brezat që do të ndjekin të njëjtën rrugë.
