Blutë e Elbasanit kanë finalizuar operacionin e koduar duke sekuestruar nje sasi te madhe droge dhe arrestuar disa persona.
Komunikimi I policisë
Vijojnë goditjet e njëpasnjëshme ndaj veprimtarisë kriminale në fushën e narkotikëve.
Finalizohet operacioni policor antidrogë i koduar “Tunjë”, i zhvilluar nga Seksioni për Hetimin e Narkotikëve në DVP Elbasan në bashkëpunim me shërbimet e Komisariatit të Policisë Gramsh.
Sekuestrohen 5 kg lëndë narkotike kanabis, 3 automjete dhe 2 telefona celular.
Vihen në pranga 2 shtetas dhe shpallen në kërkim dy të tjerë.
Në vijim të punës për goditjet e njëpasnjëshme ndaj veprimtarisë kriminale në fushën e narkotikëve, bazuar në informacionet e marra në rrugë operative, Seksioni për Hetimin e Narkotikëve, në bashkëpunim me shërbimet e Komisariatit të Policisë Gramsh, zhvilloi operacionin policor antidrogë të koduar “Tunjë”, në kuadër të të cilit u arrestuan në flagrancë shtetasit:
A.B., 30 vjeç, banues në fshatin Çerrice, Çorovodë, dhe M.D., 31 vjeç, banues në fshatin Zhepe, Çorovodë.
Si dhe u shpallën në kërkim shtetasit M.H., 22 vjeç dhe S.Q.,23 vjeç, banues në Gramsh, ku vijon puna për kapjen e tyre.
Arrestimi dhe shpallja në kërkim e këtyre shtetasve u bë pasi në aksin rrugor Gramsh-Tunjë, gjatë kontrollit të automjeteve , shërbimet e Policisë kanë gjetur dhe sekuestruar në cilësin e provës materiale 5 kilogramë lëndë narkotike kanabis sativa.
Materialet iu referuan për veprime të mëtejshme, Prokurorisë së Rrethit Gjyqësor Elbasan, për veprën penale , “Prodhimi dhe shitja e lëndëve narkotike”, kryer në bashkëpunim.
