Tiranë, 31 tetor 2025
Gjykata Kushtetuese ka rrëzuar kërkesën e paraqitur nga Presidenca për anulimin e vendimit që pezullonte dekretin presidencial mbi zgjedhjet në Tiranë. Vendimi u mor nga trupa gjykuese, e cila vendosi që çështja e dekretit të trajtohet në themel, duke u shqyrtuar në mënyrë të plotë në fund të procesit.
Kryetarja e seancës, Holta Zaçaj, sqaroi se “çështja e juridiksionit të Gjykatës për shqyrtimin e dekretit të Presidentit është e lidhur me themelin e mosmarrëveshjes. Kërkesa e paraqitur nuk pranohet në këtë fazë, por do të trajtohet si pjesë e themelit të çështjes.”
Presidenca kishte kërkuar që Gjykata Kushtetuese të anulonte vendimin për shfuqizimin e dekretit dhe të përjashtohej vetë nga shqyrtimi i kësaj çështjeje, me argumentin se ajo nuk është kompetente për të gjykuar akte të tilla të Presidentit të Republikës.
Në të njëjtën linjë me Presidencën, Këshilli i Ministrave mbështeti këtë argument, ndërsa mbrojtja e kryebashkiakut Erion Veliaj këmbënguli se Gjykata Kushtetuese është organi i duhur për të vlerësuar ligjshmërinë e dekretit presidencial që lidhet me zhvillimin e zgjedhjeve në kryeqytet.
Me këtë vendim, procesi për dekretin presidencial vijon në fazën e shqyrtimit në themel, ku pritet që Gjykata Kushtetuese të japë vendimin përfundimtar mbi vlefshmërinë e tij në një seancë të ardhshme.
