Rreth orës 15:30, Sala operative e Drejtorisë Vendore të Policisë Lezhë ka marrë njoftim për një konflikt të ndodhur në rrugën e Kunes, Shengjin, ku si pasojë ka mbetur i plagosur shtetasi Françesk Preçi, i datëlindjes 04.04.1975, banues në Lezhë.
Menjëherë pas njoftimit, forcat e policisë organizuan punën për identifikimin dhe kapjen e autorëve. Rreth një orë pas ngjarjes, në fshatin Milot u ndalua automjeti me të cilin udhëtonin dy të dyshuarit për konfliktin, shtetasit Fari Doçi, 67 vjeç, dhe Edmiral Doçi, alias Dautaj, 40 vjeç.
Nga hetimet paraprake rezulton se konflikti ka nisur për motive të dobëta, ndërsa gjatë përleshjes, njëri nga autorët dyshohet se ka goditur me një send të fortë në kokë shtetasin Preçi, duke i shkaktuar dëmtime të rënda. Pas kësaj, autorët janë larguar nga vendi i ngjarjes.
Në përfundim të veprimeve hetimore, policia ka arrestuar dy shtetasit Fari Doçi dhe Edmiral Doçi, alias Dautaj, të cilët dyshohen për kryerjen e veprës penale “Plagosje e rëndë me dashje”, kryer në bashkëpunim, parashikuar nga nenet 88 dhe 25 të Kodit Penal.
Materialet do t’i referohen Prokurorisë pranë Gjykatës së Shkallës së Parë të Juridiksionit të Përgjithshëm Lezhë për hetime të mëtejshme.
