Autoriteti Kombëtar i Ushqimit ka konfirmuar se vezët e përdorura në kopshtin nr.1 në Gramsh kanë rezultuar të kontaminuara me salmonelë.
MCN mëson se bëhet fjalë për vezët e furnizuara nga firma “Xhemi Alb”, Shkodër.
Kompania “Nelsa shpk”, e cila sipas dokumenteve zyrtare ka fituar tenderin për furnizimin e kopshteve dhe çerdheve në Bashkinë Gramsh që nga qershori i vitit 2023, i merrte vezët nga kjo kompani.
Nga analizat e AKU-së, më parë doli se mishi i pulës dhe qumështi rezultuan negativ.
Nga 79 persona të testuar, 17 rezultuan pozitivë, përfshirë 16 fëmijë dhe psikologen e kopshtit.
Aktualisht 6 fëmijë trajtohen në shtëpi dhe ndodhen në gjendje të mirë.
AKU ka pezulluar aktivitetin e kopshtit deri në përfundimin e dezinfektimit dhe analizave. Prokuroria e Elbasanit ka nisur hetimet për zbardhjen e rrethanave të infektimit.
Në reagimin e saj Bashkia e Gramshit sqaroi funksionimin e regjimit ushqimor në kopsht, shprehu kujdesin ndaj shëndetit të fëmijëve ndërkohë që kërkoi zbardhjen e rrethanave nga institucionet përkatëse.
Skandali i salmonelës në kopshtin e fëmijëve në Gramsh u identifikua një javë më parë kur disa fëmijë shfaqën simptoma të njëjta të sëmundjes duke nxitur dyshime tek mjekët të cilët kërkuan analiza të mëtejshme nga Instituti i Shëndetit Publik.
