Tiranë, 2 qershor 2025 – Vijon me dyer të mbyllura procesi gjyqësor për vrasjen e 14-vjeçarit Martin Cani, ngjarje që tronditi opinionin publik pak muaj më parë. Në seancën e fundit, pesë të mitur u paraqitën në gjykatë për të dëshmuar në cilësinë e personave me dijeni për rrethanat e krimit.
Mes dëshmitarëve ishte edhe i mituri K.B., i pranishëm në vendngjarje në momentin e vrasjes, për të cilin familjarët e viktimës kanë shprehur më herët dyshime dhe pretendime. Sipas procedurave ligjore, të miturit janë pyetur pa praninë e të pandehurit M. Përlleshaj, i dyshuar si autor i ngjarjes.
Përlleshaj, përmes avokatit të tij mbrojtës, ka mohuar akuzat, duke deklaruar se nuk ka qëlluar në drejtim të Martin Canit, por se objektivi i tij ishte Luis Meçe, i cili u plagos gjatë konfliktit.
Gjykata pritet të vijojë seancat në ditët në vijim, ku janë thirrur për të dëshmuar edhe shtatë persona të tjerë, mes tyre katër të mitur, gjithashtu në cilësinë e dëshmitarëve me dijeni për rrethanat e vrasjes. Procesi po zhvillohet nën masa të rrepta sigurie dhe me respektimin e të gjitha procedurave për mbrojtjen e të miturve.
