Pronari i kompanisë ONIMA, Erkand Shabani, ka reaguar për herë të parë pas arrestimit të këngëtarit Besart Kelmendi, duke paralajmëruar publikimin e pamjeve dhe dokumenteve që lidhen me incidentin në ambientet e kompanisë.
Në një postim në Instagram, Shabani deklaroi se deri më tani kishte zgjedhur të mos komentonte ngjarjen, por sipas tij, një “fushatë e gjerë dezinformimi” e detyroi të reagojë. Ai e përshkroi incidentin si një akt kriminal, duke theksuar se stafi ishte ndjerë i kërcënuar dhe kishte pësuar pasoja emocionale nga situata.
Shabani bëri të ditur se këngëtari ka pranuar fajësinë para organeve të drejtësisë dhe ka kërkuar falje gjatë seancës së fundit gjyqësore. Ai shtoi se për shkak të procesit gjyqësor, kishte preferuar të mos bënte deklarata më herët.
Për të sqaruar situatën dhe për të vënë në dukje realitetin e ngjarjes, Shabani njoftoi se javën e ardhshme do të zhvillohet një konferencë për shtyp, gjatë së cilës do të publikohen:
Pamje video që tregojnë momentet e incidentit dhe veprimet që ai i cilëson si “sulme tronditëse” nga ana e Gjestit.
Dokumente dhe raporte financiare që tregojnë se kompania ONIMA nuk ka asnjë detyrim financiar ndaj artistit.
Shabani u shpreh i vendosur për të zbardhur plotësisht situatën dhe për të ekspozuar çdo përpjekje të mundshme për përfitime të padrejta financiare ndaj kompanisë.
Aktualisht, këngëtari Gjesti ndodhet në paraburgim për 30 ditë në lidhje me këtë incident. Detajet mbi datën dhe vendin e konferencës për shtyp do të bëhen publike së shpejti.
