Trishtim dhe mall në Skënderbegas. Shkolla e Mesme e Bashkuar “Xhile Liçi” ka humbur sot një nga figurat më të dashura e më të respektuara të saj, Mësuesen Suzana Shaipi, e njohur me përzemërsi nga të gjithë si “Mësuesja Zana”.
Ajo u nda papritur nga jeta, duke lënë pas një boshllëk të thellë në zemrat e kolegëve, nxënësve dhe të gjithë atyre që patën fatin ta njihnin.
Me përkushtimin e saj të palodhur dhe dashurinë për arsimin, Mësuesja Suzana u bë shembull frymëzimi për breza të tërë nxënësish, duke i udhëhequr me durim, mirësi dhe pasion.
Në ambientet e shkollës sot mbizotëron heshtja dhe trishtimi, ndërsa kujtimet e saj të ngrohta, buzëqeshja dhe zëri i butë do të mbeten përgjithmonë pjesë e kësaj shkolle.
Zyra Vendore Arsimore Gramsh dhe komuniteti arsimor i Skënderbegasit i shprehin ngushëllimet më të sinqerta familjes së Mësueses Suzana Shaipi, duke nderuar me respekt figurën dhe kontributin e saj të vyer.
Pusho në paqe, Mësuese Zana. Emri yt do të jetojë në kujtimet e të gjithëve.
