AUSTRALI- Australia është në zi kombëtare, pas masakrës me 15 viktima nga sulmi terrorist në një plazh të mbushur me njerëz në Sydney. Sipas mediave të huaja, një nga dy autorët e sulmit terrorist, djali 24-vjeçar, kishte qenë shënjestër e një hetimi nga agjencia australiane e kundërzbulimit që nga viti 2019.
Konkretisht, siç raportoi rrjeti, hetimi kishte të bënte me 24-vjeçarin Naveed Akram dhe u krye në vitin 2019, pasi kishte indikacione për lidhjet e tij me organizatën xhihadiste Shteti Islamik. Informacioni thuhet se u konfirmua nga një burim nga operacioni i përbashkët kundër terrorizmit që hetonte rastin, pa u identifikuar.
Babë dhe bir hapën zjarr ndaj një turme njerëzish, duke vrarë 15 persona dhe duke plagosur 40 të tjerë. Një vajzë dhjetëvjeçare, një rabin, një i mbijetuar i Holokaustit dhe një shtetas francez janë midis viktimave të gjakderdhjes, ndërsa qindra njerëz u mblodhën për të festuar ditën e parë të Hanukkah. Ndërkohë mosha e viktimave varion nga 10 deri në 87 vjeç.
Profili i autorëve të krimit
Sipas mediave australiane, autorët e sulmit të përgjakshëm janë Sajid Akram, 50 vjeç, dhe djali i tij Naveed Akram, 24 vjeç. Babai u vra nga policia gjatë operacionit të neutralizimit. Ndërsa djali i tij është në gjendje kritike në një spital të Sidneit dhe mbetet nën mbikëqyrje të rreptë policore, pasi konsiderohet i dyshuari kryesor dhe bashkëpunëtor i mundshëm në një akt terrorist.
Ata dyshohet se kishte një marrëdhënie të ngushtë me një person i cili u arrestua në vitin 2018 dhe u dënua për përgatitjen e një sulmi terrorist në Australi si anëtar i Shtetit Islamik. Hetuesit vlerësojnë se të dy autorët i kishin premtuar besnikëri organizatës xhihadiste, ndërsa një element mbështetës i këtij vlerësimi është fakti se në automjetin që ata përdorën u gjetën dy banderola të ISIS-it.
Kreu i ASIO-s (kundërzbulimit), Mike Burgess, i tha shtypit dje se njëri nga autorët ishte i njohur për autoritetet, por nuk konsiderohej si një kërcënim i menjëhershëm. Policia e Uellsit të Ri Jugor tha se nuk ishte në gjendje të konfirmonte informacionin e ABC-së.
Siç njoftoi policia herët në mëngjes të hënën, 24-vjeçari Navid Akram lindi në Australi. Babai i tij 50-vjeçar kishte mbërritur në vend në vitin 1998 me një vizë studentore, e cila në vitin 2001 u konvertua në vizë partneri dhe pasi udhëtoi jashtë vendit, kishte marrë tri herë vizë kthimi për qëndrim rezident.
Sipas Kryeministrit Australian, autoritetet u morën për herë të parë me 24-vjeçarin në vitin 2019 bazuar në marrëdhënien e tij me të tjerët, duke shtuar se vlerësimi arriti në përfundimin se nuk kishte asnjë tregues të një kërcënimi të vazhdueshëm ose rreziku që ai të përfshihej në akte të dhunshme.
Megjithatë, ABC e Australisë raporton se flamuj të Shtetit Islamik u gjetën në makinën e përdorur nga dy terroristët të dielën, duke shtuar se oficerët australianë të FBI-së që punojnë në këtë rast besojnë se ata kishin krijuar lidhje me ISIS-in.
Mediat ndërkombëtare raportojnë gjithashtu se 24-vjeçari kishte studiuar në Qendrën Islamike Al Murad, pasi në vitin 2022 ai u shfaq në një foto ku e lavdëronte atë për njohuritë e tij të shkëlqyera të të gjitha rregullave të taxhvidit recitimit të ligjeve të Kuranit
