Shkodër, 4 shtator 2025 – Një ngjarje e rëndë kriminale ka ndodhur mbrëmjen e sotme në qendër të qytetit të Shkodrës, ku një person është qëlluar për vdekje me armë zjarri.
Sipas raportimeve paraprake, viktima është identifikuar si Kristjan Kola. Ai u qëllua me armë zjarri në një nga rrugët kryesore të qytetit, në një moment kur zona ishte e frekuentuar nga kalimtarë.
Policia ka mbërritur menjëherë në vendin e ngjarjes dhe ka nisur hetimet për zbardhjen e plotë të rrethanave. Aktualisht po mblidhen prova dhe po kontrollohen kamerat e sigurisë për të identifikuar autorin ose autorët e dyshuar.
Forcat e rendit kanë vendosur perimetër sigurie në zonë dhe kanë ngritur pika kontrolli në hyrje-daljet e qytetit, ndërsa pritet të publikohen detaje të tjera në vijim lidhur me motivet e ngjarjes dhe identitetin e autorëve.
Ngjarja ka shkaktuar shqetësim të madh mes banorëve, duke rikthyer vëmendjen te problematika e sigurisë publike në qytetin e Shkodrës.
Shkodër / Informacion paraprak
Rreth orës 22:30, në lagjen “Vasil Shanto”, në rrethana ende të paqarta, dy shtetas ende të paidentifikuar dyshohet se kanë vrarë me armë zjarri shtetasin K. K., 34 vjeç, i cili ishte në ambientet e jashtme të një lokali.
Shërbimet e Policisë kanë shkuar menjëherë në vendngjarje, janë ngritur pika kontrolli në dalje të qytetit dhe vijojnë kontrollet në zonë e në ambiente të ndryshme, për kapjen e autorëve.
Ndërkohë, është ngritur një grup i posaçëm hetimor, i cili, nën drejtimin e Prokurorisë, po punon intensivisht për sqarimin e rrethanave, dokumentimin ligjor, si dhe për identifikimin dhe kapjen e autorëve.
