Është ndarë nga jeta në moshën 91-vjeçare, stilisti i famshëm italian me famë botërore, Giorgio Armani.
“Me hidhërim të pafund, Grupi Armani njofton ndarjen nga jeta të krijuesit, themeluesit dhe forcës së palodhur lëvizëse: Giorgio Armani”, tha shtëpia e modës në një deklaratë për mediat këtë të enjte.
Armani ishte sinonim i stilit dhe elegancës moderne italiane. Ai kombinoi talentin e stilistit me zgjuarsinë e një biznesmeni, duke drejtuar një kompani që xhironte rreth 2.3 miliardë euro në vit.
Ai kishte qenë i sëmurë për ca kohë dhe u detyrua të hiqte dorë nga shfaqjet e grupit të tij në Javën e Modës për Burra në Milano në qershor, hera e parë në karrierën e tij që kishte humbur një nga eventet e tij në pasarelë.
I njohur si “Re Giorgio” – Mbreti Giorgio – stilisti ishte i njohur për mbikëqyrjen e çdo detaji të koleksionit të tij dhe çdo aspekti të biznesit të tij, nga reklamat deri te rregullimi i flokëve të modeleve ndërsa ato shkonin në pistë.
Një dhomë funerali do të ngrihet të shtunën dhe të dielën në Milano, tha kompania, e ndjekur nga një funeral privat në një datë të paspecifikuar.
