Ohër, 30 Gusht 2025 – Një incident i pazakontë është regjistruar pasditen e sotme në Liqenin e Ohrit, ku një traget pasagjerësh i linjës Ohër–Shën Naum ka devijuar nga itinerari për shkak të motit të keq, duke hyrë në ujërat territoriale shqiptare.
Trageti, i nisur nga Shën Naumi në drejtim të Ohrit, është shtyrë nga erërat e forta dhe reshjet intensive për rreth dy orë, deri në afërsi të fshatit Piskupat, në territorin shqiptar.
Sipas burimeve zyrtare, gjatë këtij devijimi, pasagjerët në bord kanë përjetuar momente paniku, por fatmirësisht nuk raportohet për persona të lënduar apo dëme materiale.
Pas përmirësimit të kushteve atmosferike, mjeti lundrues ka rifilluar lëvizjen në drejtim të Ohrit dhe është kthyer në ujërat maqedonase.
Autoritetet vendore në të dy anët e liqenit kanë reaguar në kohë, duke monitoruar situatën dhe garantuar sigurinë e pasagjerëve deri në stabilizimin e plotë të lundrimit.
