Eksperti i pensioneve, Kujtim Hoxha, i ftuar në studion e emisionit “Koha për t’u zgjuar” në News24, ka sqaruar konceptin e pensionit social, mënyrën e përfitimit dhe pritshmëritë që kanë qytetarët për një rritje në tetor.
Hoxha tha se pensioni social është futur në fuqi në vitin 2015 dhe është një pagesë që u takon personave mbi 70 vjeç, të cilët nuk kanë plotësuar vitet e nevojshme të punës për të marrë pension kontributiv.
“Pensioni social është ajo pagesë që merret në moshën 70 vjeç, për personat që nuk kanë plotësuar moshën dhe vitet e nevojshme për pension. Kërkonte disa detyrime, si fakti që në 5 vitet e fundit nuk duhej të kishe qenë jashtë shtetit, të mos kishe të ardhura të tjera, dhe është rreth 7 mijë lekë,” tha Hoxha.
Sipas tij, një pjesë e qytetarëve e shohin këtë skemë si të padrejtë, pasi edhe ata që nuk kanë kontribuar përfitojnë një pagesë. Megjithatë, pensioni social shërben edhe si mekanizëm për llogaritjen e viteve të punës.
Në lidhje me pritshmëritë e pensionistëve për rritje, Hoxha kujtoi se tradicionalisht indeksimi i pensioneve është bërë në datën 1 tetor, që përkon edhe me Ditën e Pensionistëve.
“Qytetarët presin që të ketë një indeksim ose një rritje në tetor, ndërsa mbetet për t’u parë nëse do të ketë edhe ndonjë bonus shtesë,” shtoi ai.
