TIRANË, 19 shtator 2026 – Një ngjarje e rëndë është regjistruar mesditën e sotme në zonën e Zogut të Zi, në Tiranë, ku një grua ka humbur jetën pasi dyshohet se është goditur me thikë nga bashkëshorti i saj.
Ngjarja ka ndodhur në një kompleks pranë gjimnazit “Harry Fultz”. Gruaja është transportuar me urgjencë drejt spitalit, por, pavarësisht përpjekjeve të mjekëve, nuk ka mundur t’u mbijetojë plagëve të marra.
Sipas të dhënave paraprake, bashkëshorti i saj, i dyshuar për ngjarjen, është larguar nga vendi i krimit dhe është shpallur në kërkim nga Policia e Tiranës.
Forcat e policisë po kryejnë kontrolle për lokalizimin dhe kapjen e tij, ndërsa grupi hetimor ndodhet në vendngjarje dhe po punon për dokumentimin e rrethanave dhe zbardhjen e plotë të shkaqeve të ngjarjes.
Hetimet vijojnë për të përcaktuar dinamikën e saktë të ngjarjes dhe përgjegjësinë penale të personit të dyshuar.
