TIRANË – Një operacion i strukturave të Krimit Ekonomik pranë Policisë së Tiranës ka zbuluar një skemë të dyshuar abuzive, përmes së cilës dyshohet se janë përvetësuar mbi 200 mijë euro nga llogaritë e klientëve të një banke të nivelit të dytë në kryeqytet.
Në kuadër të hetimeve, janë arrestuar dy punonjës të institucionit bankar, ndërsa gjashtë të tjerë janë vendosur në masën e sigurisë “arrest në shtëpi”. Gjithashtu, katër persona janë pezulluar nga detyra.
Hetimi ka nisur pas denoncimeve të disa qytetarëve, të cilët kanë konstatuar mungesë fondesh në llogaritë e tyre bankare. Sipas dyshimeve paraprake, punonjësit e përfshirë kanë vepruar në bashkëpunim me njëri-tjetrin për të përvetësuar shuma parash nga klientët.
Burime pranë hetimit bëjnë me dije se dëmi i dokumentuar deri më tani kap vlerën e mbi 200 mijë eurove, ndërsa autoritetet dyshojnë se numri i personave të dëmtuar mund të jetë më i lartë.
Policia dhe prokuroria po vijojnë veprimet hetimore për identifikimin e rasteve të tjera të mundshme dhe për zbardhjen e plotë të mekanizmit të funksionimit të kësaj skeme të dyshuar abuzive.
Ndërkohë, pritet që në vijim të ketë më shumë detaje zyrtare lidhur me identitetin e personave të përfshirë, rolin e secilit prej tyre dhe masat e marra nga institucioni bankar pas zbulimit të rastit.
