Tirana i falet VAR-it, dy penallti i japin fitoren me përmbysje kundër Kukësit

Tirana ka arritur të mposhtë me përmbysje Kukësin në transfertë me rezultatin 2-3, e vlefshme për javën e 22-të të Superiores.

Sfida nisi më mirë për verilindorët, me Çelën që kërkoi të debutonte me fitore.

Ishte Salami në minutën e 15-të që kaloi në avantazh vendasit, por pas një gabimi të portierit Tafas, Latifi rivendosi baraspeshën në minutën e 28-të.

Ishin sërish verilindorët që shënuan me Dragoshin në minutën e 39-të, duke e mbyllur pjesën e parë në avantazh.

Përmbysja erdhi në pjesën e dytë, vetëm falë dy penalltive të cilat u konfirmuan me sistemin VAR.

Në minutën e 69-të, ishte Abazaj që nuk gaboi nga pika e bardhë e 11-metërshit, pas një prekje të topit me dorë nga ana e Dragoshit.

Në minutën e 89-të, ishte i sapofuturi Patrik, i cili ktheu në gol penalltinë që e fitoi po vetë.

Kështu Tirana shkon në kuotën e 33 pikëve, duke u ngjitur momentalisht në vendin e tretë, ndërsa Kukësi vazhdon në vendin e parafundit me 19 pikë.