Shqipëria po vendos për herë të parë rregulla të qarta për tregun e kripto-aseteve, me projektligjin e ri që synon të sjellë transparencë dhe më shumë siguri për përdoruesit.
Të gjitha subjektet që emetojnë ose ofrojnë shërbime me kriptomonedha do të duhet të licencohen dhe të paraqesin dokumente informuese të detajuara për projektet e tyre.
“Në projektligj duhet të sqarohen rreziqet, mënyra e funksionimit dhe të dhënat e emetuesit. Dokumenti ndalon çdo material mashtrues dhe kërkon që informacioni të jetë i saktë dhe i verifikueshëm. Po ashtu, për herë të parë vendosen rregulla të detyrueshme për licencimin e këmbimit, kujdestarisë dhe platformave të tregtimit”, thekson ministria e Ekonomisë dhe Inovacionit.
Projektligji vendos detyrime të reja edhe për kompanitë që ruajnë çelësat privatë dhe menaxhojnë portofolë kripto-asetesh, duke kërkuar standarde më të larta sigurie, plane të rikuperimit dhe ndarje të fondeve të klientëve nga ato të kompanisë.
Risi për tregun është rregullimi i tokenave të parasë elektronike, të cilët duhet të mbështeten mbi rezerva reale dhe të jenë të shlyeshëm në çdo kohë.
“Kompanitë duhet të ndajnë fondet e klientëve nga asetet e tyre, të kenë politika të qarta të sigurisë kibernetike dhe plane rikuperimi”, thekson ministria e Ekonomisë dhe Inovacionit.
Me këtë kuadër të ri, autoritetet synojnë të rrisin besimin e konsumatorëve dhe të krijojnë kushte më të sigurta për zhvillimin e bizneseve teknologjike, në përputhje me standardet evropiane.
