Një situatë e turpshme ka ndodhur këtë të premte në Maqedoninë e Veriut, ku policia ka ndërhyrë për të hequr flamujt shqiptarë të vendosur për festat e 28 dhe 29 Nëntorit.
Në pamjet që po qarkullojnë në rrjet, dallohet momenti kur një polic heq nga shtylla një flamur shqiptar në Kumanovë.
Zv/ministri i Punëve të Brendshme, Astrit Iseni ka reaguar për këtë situatë, duke u shprehur se do të merren masa disiplinore kundrejt punonjësit.
“Do të ketë një procedurë disiplinore kundër punonjësit të MPB-së që hodhi flamurin shqiptar. Çdo punonjës i MPB-së ka detyrimin të respektojë ligjet dhe simbolet e të gjitha bashkësive etnike në Republikën e Maqedonisë së Veriut. Mosrespektimi i këtyre detyrimeve do të sanksionohet pa përjashtim.
Polici maqedonas duke hequr Flamurin shqiptar nga shtylla
Ligjet do të zbatohen njësoj për të gjithë, ndërsa institucionet do të jenë garancë për respektimin e tolerancës dhe të drejtave ndërmjet të gjitha komuniteteve.
Sipas nenit 319 të Kodit Penal, kushdo që me dashje nxit përçarje, intolerancë ose urrejtje përmes fyerjes ose shkatërrimit të simboleve kombëtare ose fetare, do të mbajë përgjegjësi penale. Nuk do të lejoj që një sjellje e tillë, sidomos kur vjen nga një punonjës i Ministrisë së Punëve të Brendshme, të mbetet e pandëshkuar.
Si zv/ministri i Punëve të Brendshme, unë qartë e dënoj çdo shkelje ose mosrespektim të simboleve shtetërore dhe kombëtare të Republikës së Maqedonisë së Veriut, pavarësisht nëse bëhet fjalë për flamurin e maqedonasve, shqiptarëve, apo të cilitdo bashkësi etnike tjetër.
Një tjetër video me përmbajtje skandaloze është publikuar nga Maqedonia e Verit, konretisht në qendër të Prilepit shihet duke u djegur dhe shkelur me makinë flamuri shqiptar.
Lidhur me këtë gjest, partia shqiptare në opozitë, BDI kërkon që menjëherë të merren masa të njëjta, sipas tyre, si në rastin e shqiptarëve të arrestuar se shkarravitën flamurin maqedonas.
Videoja e djegies së flamurit, pason disa pamje të tjera ku shihet një polic i Maqedonisë së Veriut që hipën mbi furgonin e policisë për të hequr flamurin shqiptar nga shtylla.
