Instituti Kombëtar i Shëndetësisë Publike të Kosovës (IKSHPK) ka njoftuar se dy persona kanë humbur jetën si pasojë e virusit të Nilit Perëndimor, ndërsa gjatë periudhës nga 7 gushti deri më 18 shtator 2026 janë konfirmuar gjithsej shtatë raste me këtë infeksion. Rastet e prekur nga virusi përfshijnë pesë meshkuj dhe dy femra të grupmoshave nga 10 deri në 79 vjeç, ku tri raste janë regjistruar në Gjakovë dhe nga një rast në Prishtinë, Shtime, Ferizaj e Pejë. Të gjithë pacientët janë trajtuar në Klinikën Infektive të QKUK-së me simptoma të meningjitit akut, meningoencefalitit ose gjendjes febrile, ndërsa dy viktimat e raportuara këtë javë janë klasifikuar si raste sporadike pa lidhje epidemiologjike me njëra-tjetrën.
Sipas të dhënave të ECDC-së të cituara nga IKSHPK, që nga fillimi i sezonit të transmetimit deri më 10 shtator janë identifikuar 1,285 raste humane të virusit të Nilit Perëndimor në 15 shtete evropiane, përfshirë edhe vendet fqinje. Në përgjigje të situatës, Qendrat Rajonale të Shëndetit Publik kanë ngritur nivelin e vigjilencës dhe kanë nisur hulumtimet në terren, veçanërisht në rajonin e Gjakovës. Institucioni u ka bërë thirrje autoriteteve komunale të intensifikojnë procesin e dezinsektimit dhe eliminimit të vatrave të mushkonjave, ndërsa qytetarëve u rekomandohet përdorimi i masave mbrojtëse personale, si produktet repelente, veshjet mbrojtëse dhe rrjetat në dritare.
