Elbasan, 21 tetor 2025 — Ish-deputetja e Partisë Demokratike në Elbasan, Zheni Gjergji, ka marrë zyrtarisht detyrën si drejtoreshë e Spitalit Rajonal “Dr. Xhaferr Kongoli”. Lajmin ajo e ka bërë publik përmes një postimi në rrjetet sociale, duke i dhënë fund zërave që qarkullonin prej disa ditësh në qytet.
Në deklaratën e saj, Gjergji thekson se ky është një vendim thellësisht profesional dhe njerëzor, i ndarë nga çdo konotacion politik, me qëllimin për të përmirësuar shërbimin shëndetësor për qytetarët e Elbasanit.
“Kjo nuk ishte një zgjedhje e lehtë politike, por një vendim profesional dhe njerëzor. Pavarësisht angazhimit tim të mëparshëm politik, unë kam qenë dhe mbetem mjeke. Profesioni im është thirrje, jo pozicion,” shkruan ajo ndër të tjera.
Gjergji shprehet se ndjen përgjegjësi dhe përulësi për detyrën e re, duke e konsideruar drejtimin e spitalit si një nder dhe sfidë që kërkon përkushtim, dije dhe ndershmëri.
“Të jem në krye të institucionit më të rëndësishëm shëndetësor të qytetit është për mua një nder, por mbi të gjitha një sfidë që kërkon përkushtim, dije dhe ndershmëri,” shton ajo.
Në fund të mesazhit të saj, Gjergji falënderon për besimin e dhënë dhe premton angazhim të plotë “në shërbim të pacientit, stafit mjekësor dhe dinjitetit të kujdesit shëndetësor”.
Emërimi i Zheni Gjergjit shihet si një zhvillim me peshë në drejtimin e institucioneve shëndetësore të qarkut Elbasan, ndërsa pritet me interes mënyra se si ajo do të menaxhojë njërin prej spitaleve më të mëdha të vendit.
